Svātdiņ, 2026. gods augusta 30. dīnā, Rudzātu bibliotekā nūtyka Byumaņu jaunīšu plenera dorbu izstodys atdareibys. Ite izstateiti dorbi, kurūs sataiseja plenera dalinīki pa bīdreibys “LVC” projektam programā “Leivuona nūvoda jaunīši VAR” (nūteikst ar Leivuona nūvoda atspaidu, organizej Praiļu-Leivuona partnereiba “Kūpā”). Pleners nūtyka Rudzātu pogosta Byumaņūs, 2026. gods juļa 25.–30. dīnuos.
Bīdreiba “LVC” jau gondreiž 2 dekadis dora Rudzātu pogostā, aizajimdama ar vītejū kuļturu i volūdu, irā izdavuse gruomotys, statejuse ceļa zeimis, pastatejuse mūku i c. Lelums dalinīku – ite vītejī dzeivuotuoji. Niu dalinīku bārni izauguši gona leli, kab varātu i poši organizēt projektus. Itys projekts deve vareibu paturēt Leivuona nūvoda jaunīšu iniciativu vizualuos muokslys sperā, kab jī dabuotu zynuošonys, prasmis i kompeteņcejis linograpikys teknikā. Linograpika – ite pormys izgrīzšona linolejā, kurū piečuok apzīž ar kruosu i atmīdz iz papeira. Jaunīši vuicejuos i grīzt, i atmīgt, i taiseit ramys nu sagativātūs reiceņu.
Projekta vadeituoja, jaunuo muokslineica Bierzeņa Buorbola pastuosteja, ka pajuta cīši lelu prīcu nu tuo, ka projekta dalinīki īguoja azartā i vīna dorba vītā sataiseja daža pa nazcik dorbu.
Leivuona nūvoda dūmis prīšksādātuojs Rubyna Davids sovā runā pastreipova, ka itei projekta programa dūmuota deļ tuo, kab jaunīši poši organizātūs i kū naviņ iņceresnu kūpā dareitu, i ka taišni tai itymā projektā i saguojs. Taipoš labi, ka projekti nūteikst na viņ mīstā, bet i pogostūs. I itam projektam beja i dalyktuo vierteiba – pi vīna saguoja paturēt latgaliskumu.
Rudzātu bibliotekare Rudzāta Iluta papaļdeja vysim dalinīkim i pasaceja, ka redzīs, ka bārni staravejušīs i ka pi kotra irā sovs vierzīņs i muokslinīciskais pasauļs.
Izstotā pi sīnu karinej gotovī, dataiseitī dorbi, iz goldu radzams process – linoleja grīzumi i mozī darbeni. Izstota byus daīmama da seņcebra beigu, i organizātuoji vysus īprosa nūīt apsavārtu.
Aņss Ataols Bierzeņš, specialai deļ Latgolys vītejuos gazetys