Kai mes braucem iz sadanci “Maija zīdu virpulī” Vērēmūs

16. maijā – pošā pavasara plaukumā tik vylynūšs beja Vērēmu “Mārtiņrožu” aicynōjums uz sadanci “Maija zīdu virpulī”! Kurš gon nu taida vilinōjuma atsaturēs?! Tai ari mes – “Bokōnu Bryuklines”, kai Zyrga godā pīsanōk, jyudzem sovu zyrgu (ar mašynu niu benzins cīši dōrgs) un devemīs uz Bērzgales tautas nomu. Bet tai kai gobols teiri lobs – ap 80 kilometru – un zyrgs myusim sprauns, tod nu rōvem pa kolnim, pa lejom, ka gar ausim šviļpoj vēji, plivinoj moti! Tik piļņavōjom, lai naapsagōž roti! Roti gon naapsagōze, bet kučeram capuri-hūti nūrōve un pa vējam aiznese!
Tykom Bērzgalē! Oho, a tur 16 draugu kolektivi nu vysas Latgolas un Vidzemes. Nu, ka jau asom Sadancī, tod “Bokōnu Bryuklinem” uz skatuves jōbrauc ar sovu zyrgu… Bet nu kai to kučīrs bez hūtes? Paprasieju brašim veirīšim – nivīnam nav! Bet par laimi kulturas nomā ir ari muzejs. Tod nu saprūtūša, pretimnōkūša muzeja vadeitōja Skaidrīte Apeināne glōbe – ar muzeja eksponatu – Ontona Rupaiņa hūti! Paknopōka gon beja, bet tūtīs īpašs pacālums, doncōt ar slaveneibas capuri (maņ ir jō grōmota “Māra mostas”). 
Beja patīss prīks un gūds pīsadaleit tik krōšņā koncertā – eistā zīdu virpulī! Izbaudeit  ikvīna kolektiva snīgumu, kulturas noma vadeitōjas Guntas Matvejenko laipneibu, muziķa Ingara Gusāna mōcētprasmi, fotomeistara Nikolaja Mortukāna meistareibu, azartiskōs Vērēmu-Ilzeskolna kulturas vadeitōjas, ari muzikes Annas Viškeres pasōkuma vadeišonas īpaši vīsmīleigū energiju, darbeigōs bērzgalītes “Mārtiņrozes” Vijas Kuzminas vēstējumus, aktivistes Inas Tučes aktivumu! Un, prūtams, vyscīšōk klonomīs apsvīdeigūs, čaklūs saimineicu – “Mārtiņrožu” prīkšā! Paļdis par skaisti nūformātim goldim, smolkim konditorijas izstrōdōjumim, smekeigu sīru un kafeju, pateikami atsvaidzynōja ari Bērzgales bazneicas okas dzidrō, svēteigō iudiņa garša – prīstera Andra Jonāna veļtejums! Un īpaša pateiceiba iniciatorei – vērīneigai, jaudeigai “Mārtiņrožu” un vēļ treju kolektivu vadeitōjai, spraunajai Silvijai Nakonečnajai! Ar pateiceibas vōrdim – lai slava tom, lai slava tom – “Mārtiņrozēm” daiļajom! Lai slava tai, lai slava tai, tai “Mārtiņrožu” Silvijai! Cīņā, apbreinā un pateiceibā – “Bokōnu Bryuklines”  un Dzidra Bruzgule Bokōnūs!