27. apreļs – Latgolys kongresa dīna:  pasuokumi Rēzeknē

Jau ūtrū godu Latgolys kongresa dīnys pasuokumi nūteik Rēzeknē. Itūreiz byus vareiba pīsadaleit navaļstiskūs organizaceju i Ministru kabineta izbraukuma Memoranda padūmis sanuoksmē, rysynojūt Latgolys atteisteibai svareigus vaicuojumus, vydsškolānim pīsadaleit patriotiskā izalauzšonys spēlē “Kroma kolna boguoteibys” Ondrupinis pogosta Kroma kolnā, taipoš vysim sasatikt guojīnī pa Rēzekni i atceris pasuokumā pi Latgolys Mārys. 
Videjuos izgleiteibys pūsma puorstuovi – Dagdys, Maltys, Kaunatys vydsškolu i Juoņa Egleiša Preiļu Vaļsts gimnazejis – jau nu poša reita bīdreibys “Kroma kolna bruoliste” vadeibā ruodeis sovys prasmis komandys i individualūs puorbaudejumūs Kroma kolnā, kab aplīcynuotu, ka ir tikpat izveiceigi, vīnuoti i seiksti, kaidi bejuši myusu seņči, apsazynojūt, ka dzeivoj iz rūbeža i sevkuru šaļteņu var pasamaineit breivuos dzeivis situaceja. Vydsškolānus sagaideisim Rēzeknē, gūdynojūt Latgolys kongresa dīnu i jūs pošu veikumu.
Navaļstiskuo sektora puorstuovi, uzjiemieji i sevkurs, kuram ir, kū saceit Latgolys drūšeibys, sabīdreibys nūtureibys, ekonomiskuos atteisteibys, inovaceju pīsaistis i medeju telpys vaicuojumā, gaideiti iz NVO i MK Memoranda padūmis izbraukuma sanuoksmi i daleibu dorba grupuos Rēzeknis nūvoda dūmē. Tī gon ir īprīškeja pīsateikšona da 22. apreļa – https://forms.gle/9orrgH7mMWiwuBR67.
Vysi interesenti aicynuoti pīsavīnuot svātku guojīņam nu pīminis vītys “Latgolys kongresam 100” (pļkst. 13.30) da pīminekļa “Vienoti Latvijai”, kur nūtiks atceris pasuokums, gūdynojūt seņčus, kas beja Latvejis vaļstiskuma idejis nesieji, i tūs, kas tū dareis nuokūtnē – patriotiskuos izalauzšonys spēlis “Kroma kolna boguoteibys” dalinīkus. Pyrma tuo vēļ var paspēt nūsaklauseit viesturnīka Henriha Soma lekceju par Latgolys kongresa nūzeimi Latgolys Kulturviesturis muzejā. Zīdus, kai īrosts, veļteisim ari Latgolys dareituojim, kuru pīminis vītys ir Atbreivuošonys alejā voi tīpat natuoli apleicīnē: Fraņčam Trasunam, Nikodemam Rancānam, Fraņčam Kempam, Valerijai Seilei, Vladislavam Luočam i Ontonam Kūkuojam.
Pasuokumi nūteik ar Rēzeknis nūvoda dūmis, Rēzeknis vaļstspiļsātys Kulturys i turisma puorvaļdis i Saeimys Latgolys apakškomisejis, Latgolys kongresa lāmumu izpiļdis padūmis, Zemissardzis 3. Latgolys brigadis atbolstu. Pasuokumu organizej Latgalīšu kulturys bīdreiba sadarbeibā ar Rēzeknis nūvoda dūmi, Latvejis Pilsūniskū aliansi i Vaļsts kancelejis puorstuovim, informej Latgalīšu kulturys bīdreibys vadeituoja Ilga Šuplinska.