Dasmytais Nikodema Rancāna konkursa nūslāguma pasuokums nūtyka 21. septembrī Maltys vydsškolā. Latgalīšu kulturys bīdreiba padeve septenis pokovsaktys, Latgolys Etnografiskuo viestnīceiba caturtū reizi, bet Latvejis Izgleiteibys i zynuotnis darbinīku arūdbīdreiba trešū reizi padeve sovys eipašuos bolvys.
Itūgod konkursam beja dasaceiti 17 školuotuoji nu Rēzeknis, Kruoslovys, Leivuona, Preiļu nūvoda i Rēzeknis vaļstspiļsātys. Leivuona nūvoda školuotuoji beja konkursā pyrmū reizi i sajēme divys sudroba pokovsaktys, obys par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školā: Anna Kārkle, Leivuonu 1. vydsškola, folklorys kūpys “Ceiruleits” vadeituoja, i Rasma Svikle-Popova, školuotuoja Rūžupis i Jersikys školuos i dzejneica.
Juoatzeist, ka konkurss sajuta ituos vosorys Dzīšmu svātku atbluozmi: vaira beja nomināti muzykys školuotuoji, kuru sasnāgumi īprīškejā godā pateišom beja jiutami. Nominacejā “Par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školā” tyka gūdynuoti: Māris Susejs, Kruoslovys Muzykys i muokslys škola, Mārtiņš Dzindzuks, Viļānu Muzykys i muokslys škola, kai ari divys specialuos pokovsaktys taišni itamā nominacejā: Irēnai Rancānei, Nautrānu vydsškola, i Svetlanai Bilinskai, Rēzeknis suokumškola.
Nominacejā par radūšu i psihologiski atbolstūšu pīeju muoceibu ci studeju vidē itūgod beja mozuoks dasacejumu skaits, tok bolva tyka daškierta Juoņa Egleiša Preiļu Vaļsts gimnazejis latvīšu i latgalīšu volūdys školuotuojai ar 44 godu dorba stažu, metodiskuos apvīneibys vadeituojai, Humānuos školys ideju nesiejai Irēnai Baronei.
Latgolys Etnografiskuos viestnīceibys eipašuo bolva – lele pošdarynuotā etnografiskā tautystārpā – tyka daškierta Ārijai Bergmanei-Sprūdžai, foklorys kūpys “Jumalāni” vadeituojai, Rībeņu školys absolventei i ilggadejai školuotuojai.
Sovukuort Atzineibu par radūšu i psihologiski atbolstūšu pīeju muoceibu ci studeju vidē sajēme Jānis Poplavskis, Rēzeknis Vaļsts 1. gimnazejis direktors, fizikys školuotuojs, i Maija Šemele, Kruoslovys Varaveiksnis vydsškolys direktoris vītneica, geografejis školuotuoja, bejušuo Rūbežnīku školys direktore. Atzineiba par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školā itūreiz daškierta Oļesjai Apīnei, Drycanu PII i Rēzeknis piļsātys PII “Māriņa”, Ilgai Macānei, Viļānu vydsškola, Rēzeknis nūvods, Ingai Skerškānei, Kruoslovys gimnazeja, Līgai Augstkalnei, Drycanu vydsškola, Rēzeknis nūvods, Regīnai Ružai, Gaļānu pamatškola, Preiļu nūvods, Ingūnai Zeiļai i Anitai Klovānei, Rēzeknis Vaļsts pūļu gimnazeja i Ligitai Stivriņai, Kruoslovys Varaveiksnis vydsškola, Kruoslovys nūvods.
Latvejis Izgleiteibys i zynuotnis darbinīku arūdbīdreibys (LIZDA) vadeituoja Inga Vanaga sovā uzrunā atguodynuoja, ka “Latgola ir vīneigais regions, kur ir školuotuoju gūdynuošonys pasuokums ar speciali īdybynuotu bolvu, tys ir vīneigais regiona mārūga pasuokums. Tok ūtrū godu piec kuortys, var saceit, puormontojūt ideju nu Latgolys, Goda školuotuoja bolvys konkursu reikoj ari Latvejis Universitate.” LIZDA sovys bolvys padeve vairuokim školuotuojim: Anitai Klovānei (Rēzeknis Vaļsts pūļu gimnazeja), Irēnai Rancānei (Nautrānu vydsškola), Ilgai Macānei (Viļānu vydsškola), Ingai Skerškānei (Kruoslovys gimnazeja), Līgai Augstkalnei (Drycanu vydsškola) i Annai Kārklei (Leivuona 1. vydsškola).
Nūslāguma pasuokuma daleibnīki pīsadaleja Školuotuoju gūdynuošonys stuņdē, prīcuodamīs leidza ar nominantim par eisajim video par školuotuojim, īzasaistūt Nikodema Rancāna dzeivis faktus izzynūšā aizdavumā, baudūt Rēzeknis nūvoda vokaluos studejis “Skonai” skaneigūs bolsus i vīnkuorši sirsneigi pavodūt laiku sūpluok.
Itū reizi žūrejā beja Saeimys deputati, kas īvālāti nu Latgolys, – Anna Rancāne, Alīna Gendele, Edmunds Teirumnieks, Juris Viļums i Valdis Maslovskis. Paļdis par finansialu i informativu atbolstu kai individualajim zīduotuojim, tai Latgolys pošvaļdeibom: Rēzeknis, Ludzys, Bolvu, Preiļu, Leivuona, Kruoslovys nūvodam i Rēzeknis vaļstspiļsātai. Par informatīvu atbolstu paļdis portalam lakuga.lv, Latvejis radio Latgolys studejai i “Vītejai Latgolys Avīzei”.
Konkursu organizēja Latgalīšu kulturys bīdreiba sadarbeibā ar Latgolys Etnografiskū viestnīceibu, LIZDA i Maltys vydsškolu.
Eisūs video par školuotuojim varēs redzēt Latgolys.kongress YouTube lopā.
Ilga Šuplinska,
Latgalīšu kulturys bīdreibys vadeituoja
Amandas Anusānes foto