Pīsokit pedagogus Nikodema Rancāna bolvai

Ari itūgod Latgalīšu kulturys bīdreiba sadarbeibā ar Latgolys Etnografiskū viestnīceibu i Latvejis Izgleiteibys i zynuotnis darbinīku arūdbīdreibu organizej Nikodema Rancāna konkursu izcyluokajim Latgolys pedagogim.
Konkurss navarātu nūtikt bez Latgolys Planavuošonys regiona i Latgolys pošvaļdeibu atbolsta. Gaideisim dasacejumus konkursam da 15. septembra (īskaitūt). Nūslāguma pasuokums nūtiks 21. septembrī 14.00 stuņdēs Maltys vydsškolā.
Konkursa laureatim bolvu daškir itaiduos nominacejuos:
•    par latgaliskuos vidis radeišonu i latgaliskūs vierteibu saglobuošonu i styprynuošonu pyrmsškolys izgleiteibys īstuodēs;
•    par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školys vuiceibu vidē;
•    par sasnāgumim latgalīšu volūdys, literaturys i kulturviesturis īdzeivynuošonā augstuokuos izgleiteibys īstuodis studeju vidē;
•    par rodūšu i psihologiski atbolstūšu pīeju vuiceibu procesa organiziešonā (aicynoj dasaceit izgleiteibys īstuožu vadeituojus).
Pretendenti vysuos nominacejuos aicynuoti paruodeit modernūs tehnologeju pīlītuojumu vuiceibu dorbā. Konkursa žurejis sastuovā ir Latgalīšu kulturys bīdreibys vaļde, Latgolys Etnografiskuo viestnīceiba, Latgolys Planavuošonys regiona pošvaļdeibu puorstuovi. Dasacejuma anketa i konkursa nūlykums: www.latgolyskongress.lv, www.lakuga.lv. 
Maltys vydsškola ir vīneiguo, kurā ir bejuse vareiba apgiut rūtkolšonys pamatus. Bolvys autors i vuiceibu kursa izveiduotuojs ir Rihards Ciblis. Tei ir breineiga vareiba apsavērt juo i školys veikumu latgalīšu rūtu izstuodē, nūruoda organizatoru puorstuove Ilga Šuplinska.