10. septembrī Rēzeknis nūvoda Rogovkā nūtika pyrmais dzejis slams latgaliski “Rogovkys dzejis voga”, kurā sasaceņte deveni latgaliski rokstūši autori. Pasōkums beja vīna nu septembrī tradicionalūs Dzejis dīnu laika nūtikšonu. Dzejis slams ir dzejis kusteiba, kas Latvejā i pasaulī (storptautyski zynoma kai “Poetry slam”) atdzeivynōjuse interesi par myusu dīnu dzeju. 
Rogovkā sasaceņte deveni latgaliski rokstūšī autori, daļa nu kuru beja atklōjums ari pasōkuma apmaklātōjim: Annele Slišāne, Gunta Ločmele, Mārīte Slišāne, Maruta Avramčenko, Līvija Liepdruviete, myglōjs, Rasma Svikle, Jana Skrivļa-Čevere i Deimārs. Dzejnīku snāgumu vērtēja pīci žurejis lūcekli: dzejneica i publiciste Anna Rancāne, literaturzynōtneica Ilga Šuplinska, Latvejis Radejis Latgolys studejis vadeitōja Renāte Lazdiņa, latvīšu volūdys i literaturys školōtōja, Latgalīšu volūdys, literaturys i kulturviesturis školōtōju asociacejis vadeitōja Veronika Dundure i latgalīšu kulturys ziņu portala lakuga.lv redaktore Laura Melne, kai ari kai sastais žurejis lūceklis beja skateitōju bolsōjums. Pyrmajā kōrtā sovu dzeju skaiteja vysi slama dalinīki, ūtrajā kōrtā tyka pīci lobōkī, bet par “Rogovkys dzejis vogys” uzvarātōja gūdu finalā sasaceņte Annele Slišāne, Rasma Svikle i Mārīte Slišāne. Par lobōkū žureja i skateitōji atzyna Mārīti Slišāni, kura sajēme ari naudys bolvys – 100 eiro nu Nautrānu pogosta pōrvaļdis i 100 eiro nu latgalīšu kulturys ziņu portala lakuga.lv. Portalā tyvōkajā laikā slama uzvarātōjis Mārītis Slišānis saceņseibā skaiteitūs dzejūļus varēs ari pōrskaiteit kotrys interesents. Kai atzeist poša Mārīte, jai itei uzvara ir cīši lels pōrsteigums.
Pyrmōs “Rogovkys dzejis vogys” vadeišona beja uztycāta raidejumu i pasōkumu vadeitōjam, improvizatoram Kozmenam aba Mārtiņam Kozlovskim, storp dzejis skaitejumim par muzykalajom uzastōšonom pasaryupēja dzīsminīks Vinsents Kūkojs i grupa “Borowa MC”, nūtikšonu nūslēdze Ingars i Mareks Gusāni ar dzīsmi-Rogovkys himnu “Ar Reigys morali”, bet piec dzejis slama uzvarātōju nūskaidrōšonys pasōkuma apmaklātōji beja aicynōti iz balli, kuru spēlēja Jānis Poplavskis.
Dzejis slama nūsaukumā “Rogovkys dzejis voga” simboliski sasaveja septembra pyrmō daļa, kas laukūs īrosts ir ražys nūvōkšonys, jo eipaši buļbu laseišonys laiks, i dzejis saceņseiba. Leidzeigi kai buļbu vogā, kur zynomu apbreinu izapeļnej dreižōkais i ceņteigōkais laseitōjs, ari slamā vys tik kai uzvarātōjs da gola teik tys, kurs ar sovu rodūšū dorbu spiej vysa spylgtōk pōrlīcynōt žureju i skateitōjus, ir izveiceigōkais vōrdu meistars. Nūtikšonys reikōtōji prīcojās par skateitōju i dalinīku lobajom atsauksmem piec pasōkuma i ir īceriejuši dzejis slamu “Rogovkys dzejis voga” reikōt ari cytugod.
Latgalīšu dzejis slama “Rogovkys dzejis voga” idejis autore ir Nautrānu pogosta kulturys pasōkumu organizatore Inga Vigule, bet tū reikōja Nautrānu pogosta pōrvaļde sadarbeibā ar bīdreibu “LgSC” i latgalīšu kulturys ziņu portalu lakuga.lv. Nūtikšonu atbaļsteja Rēzeknis nūvoda pošvaļdeiba.
(Sagatavōts piec Edeitis Husaris materiala.)
Amandys Anusānis foto (portals lakuga.lv)